ಸಂಭ್ರಮದ ಸವಿ ಸಮಯ

ಹನಿಗವನಗಳು ಮೂಡಿ ಬರುವ ಸಮಯ

ಸಿಹಿಗನಸುಗಳು ಕಾಡಿ ಬರುವ ಸಮಯ

ನನಗಾಗಿ ಒಲವೆಂಬ ಸವಿಯ ಸುಧೆಯ

ನಲುಮೆಯಾ ಪ್ರಿಯಕರನು ತರುವ ಸಮಯ

                                    ಹಸಿವೆಯೂ ಹಿತವಾಗಿ ಬರುವ ಸಮಯ

                                    ನಿದಿರೆಯ ಮಧುರವಾಗಿ ಮರೆವ ಸಮಯ

                                    ನನ್ನ ನಿನ್ನಯ ನಡುವೆ ಸಣ್ಣ ತೆರೆಯ 

                                    ಸರಿಸುತ್ತ ಸನಿಹಕ್ಕೆ ಬರುವ ಸಮಯ

ಪ್ರೇಮ ಪತ್ರಗಳನ್ನು ಬರೆವ ಸಮಯ

ಈ ನಿವೇದನೆ ನಿನಗೆ ತರುವ ಸಮಯ

ಕಿವಿಗೊಟ್ಟು ಕೇಳುತ್ತ ನನ್ನ ಕರೆಯ

ಒಪ್ಪಿ  ನೀ  ಓಲೈಸಿ ಬರುವ ಸಮಯ 

ಪರಿಚಯ

ನಿನ್ನ ಕಂಗಳು 

    ನನ್ನ ಸೆಳೆಯಲೆಂದೇ 

             ತಾಲೀಮು ನಡೆಸಿದಂತೆ 

ನಿನ್ನ ನುಡಿಗಳು 

    ನನ್ನ ಮಾತುಗಳ ಬಂಧಿಸಿ

              ಮೌನಿಯಾಗಿಸುವಂತೆ 

ನಿನ್ನ ನಗೆ 

   ನನ್ನ ನೋವುಗಳಿಗೆ 

               ಮುಲಾಮು ಹಚ್ಚಿದಂತೆ 

ನಿನ್ನೊಲವು

    ಹೊಸದಾದ ನನ್ನನ್ನು

               ನನಗೇ ಪರಿಚಯಿಸಿದಂತೆ

ನಿನ್ನೊಳಿದೆ ನನ್ನ ಮನವು....

ನದಿಯ ದಂಡೆಯ ಮೇಲೆ
ಸುಖವಾದ ಸಂಜೆಯಲಿ
ಒಬ್ಬಳೇ ಕುಳಿತಿರಲು ದಿಟ್ಟಿಸುತ್ತ
     
             ತಂಗಾಳಿ ಹಿತವಾಗಿ
             ಕೆನ್ನೆಗಳ ಸ್ಪರ್ಶಿಸಿದೆ
             ಕಣ್ಣ ಹನಿಗಳ ಮೆಲ್ಲ ಒಣಗಿಸುತ್ತ


ಕಾಡುತಿಹ ನೆನಪುಗಳ
ದೂಡುವಾ ಯತ್ನದಲಿ
ಸಾಗುತಿಹೆ ಮೌನಡೆದೆ ಪಯಣಿಸುತ್ತ
              
               ದಣಿದೆರೆಡು ನಯನಗಳ
               ರೆಪ್ಪೆಗಳು ಅಪ್ಪಿಹವು
               ಎದೆಯ ಭಾರವ ಮೆಲ್ಲ ಕರಗಿಸುತ್ತ


ನೀರಿನಲೆಗಳು ಹರಿದು
ಪಾದಗಳ ಚುಂಬಿಸಿವೆ
ಹಿತವಾಗಿ ಬೆರಳುಗಳ ಸ್ಪರ್ಶಿಸುತ್ತ
        
                ದೂರದಾ ಚಂದಿರನ
                ಹಾಲು ಬೆಳದಿಂಗಳದು
                ತಂಪನೆರೆದಿದೆ ಮನವ ಬೆಳಗಿಸುತ್ತ


ಎಲ್ಲ ತರಹದ ಚಿಂತೆ
ಭೂತಕಾಲದ ಸಂತೆ
ಕೊಚ್ಚಿಹೋಗಿದೆ ಇಂದು ನೀರಿನತ್ತ


                   ಇಂದಿನಾ ಸಂಜೆಯದು
                    ನನಗಾಗಿ, ನಾನಿಲ್ಲಿ
                    ನಾನಾಗಿ ಜೀವಿಸಿಹೆ ನಸುನಗುತ್ತ
ನನ್ನ ಈ ಏಕಾಂತ
ನೆಮ್ಮದಿಯ ಹುಡುಕಾಟ
ಸುಖವಾಗಿ ಸವಿದಿಹೆನು ಅನುಭವಿಸುತ
                
                     ಕ್ಷಣಿಕ ಸುಖವಿದು ನಲ್ಲ
                     ಮತ್ತೆ ನಿನ್ನಯ ನೆನಪ
                     ಜಾಡು ಹಿಡಿದಿದೆ ಮನವು ಕನವರಿಸುತ
              
                 

ಭಾವನಾ

ತುಟಿಯ ನಸುನಗೆಯಲ್ಲಿ ಭಾವಗೀತೆಯ ಹೆಣೆದು,
ಕಣ್ಣ ಹನಿಗಳ ಲಯಕೆ ಮಟ್ಟು ಹಾಕುತ ಕುಣಿದು,
ಬೆಳಗಿ ಭಾವದ ಜ್ಯೋತಿ ಮನದ ಮಂಟಪದಲ್ಲಿ,
ಹೃದಯಗಳನರಳಿಸುವ  ಕನಸುಗಳ ಬೆಳಕಲ್ಲಿ.
              
                     ಕೋಪ ತಾಪವ ಕಳೆದು, ಕುಗ್ಗಿಸುತ ದುಃಖಗಳ,
                     ಸಿಕ್ಕ ಸುಖಗಳ ಪಾಲನನುಭವಿಸುವ...
                     ಭಾವದೇವಿಯೆ ಬೆಳಕು ಸಿಹಿ ಕನಸುಗಳ ಮೆಲುಕು,
                     ಹೊಸಬಾನು, ಹೊಸಭಾವದಲಿ ಹಾರುವ.....

ನನ್ನ ಗತಿಯೇನು....??

ಮಿಂಚಂತೆ ಆಕರ್ಷಿಸುವ
    ಆ ನಿನ್ನ ನಗೆಯೇನು...?
ಮುತ್ತುಗಳಂತೆ ಕಂಗೊಳಿಸುವ
    ಆ ಕಣ್ಣ ಹೊಳಪೇನು...??

ಕಣ್ಣಲ್ಲಿ ಕಣ್ಣಿಟ್ಟು ನಿನ್ನ ನಾ ನೋಡುವಾಗ,
  ಕಂಗಳಲೆ ಪ್ರೇಮ ಕವಿತೆಯ ನೀ ಬರೆದರೆ,
                                       ನನ್ನ ಗತಿಯೇನು...??

ನಗೆ...

ವದನಾರವಿಂದದಲಿ ಮುದ್ದಾದ ಮುಗುಳುನಗೆ 
ಮನಸೆಳೆದ  ಈ ನಗೆಯ ಅರ್ಥಗಳು ನೂರು ಬಗೆ 
ಒಂದು ನಗೆಯಲಿ ನೂರು ಮನ ಬೆಳಗುವಾ ನಲುಮೆ
ನಲುಮೆ ಒಲುಮೆಗಳಲ್ಲಿ ಸಂತಸದ ಸಿಹಿ ಚಿಲುಮೆ.... :-) 
------------------------------ :-) :-)
         ಈ ಕವನದಿಂದ ನನ್ನ ಭಾವಗಳ ಹೂಗುಚ್ಛವನ್ನು ಕವನಗಳೊಂದಿಗೆ ತೆರೆದಿಡುತ್ತಿದ್ದೇನೆ.....  ಇನ್ನು ಮುಂದೆ ನನ್ನ ಇನ್ನಷ್ಟು ಕವನಗಳ ಅನಾವರಣ ಇಲ್ಲಿಯೇ.....
ಶುಭಾಷಯ.

ನನ್ನ ಅನಾವರಣ....
                ಕವಿಗಳ ಎತ್ತರಕ್ಕೂ ಅಲ್ಲದ, ಸಾಮಾನ್ಯರ ಮಾತುಗಳ ಮಟ್ಟಕ್ಕೂ ಅಲ್ಲದ ವಿಶೇಷ ಕನ್ನಡ ನಮ್ಮದು.  ಇದೇ ಭಾಷೆಯನ್ನು ಭಾವನೆಗಳ  ಅಭಿವ್ಯಕ್ತಿಗೆ  ಬಳಸಿಕೊಂಡು ಅಡ್ಡ ಕಸುಬೀ ಕವಿಗಳಾಗಿ ರೂಪುಗೊಂಡಿರುವ ನನ್ನಂಥ ಎಲ್ಲ  ಬಂಧು ಬಾಂಧವರಿಗೆ ನನ್ನ ಹೃತ್ಪೂರ್ವಕ ನಮಸ್ಕಾರಗಳು. ದೊಡ್ಡ ಕವಿಗಳ ಎತ್ತರದ ಕನ್ನಡವನ್ನು ಓದಲು ಹೋಗಿ ಏನೂ ಅರ್ಥವಾಗದೆ ಕೊನೆಗೆ ಸಿನಿಮೀಯ ಸಾಹಿತ್ಯದ ಕನ್ನಡವನ್ನು ಮಹಾನ್ ಕನ್ನಡಿಗರಂತೆ ಆಸ್ವಾದಿಸುವ ನನ್ನೆಲ್ಲ ಮಿತ್ರರ ಗುಂಪಿಗೆ ನಾನೂ ಸೇರುತ್ತೇನೆ.


                    ನನ್ನ ಈ ಬರವಣಿಗೆ ನನ್ನ ಭಾವನಗಳನ್ನೂ, ನನ್ನ ಅರ್ಧಂಬರ್ಧ ಕವಿತ್ವವನ್ನೂ ಬಿಂಬಿಸುವ ಒಂದು ಸಣ್ಣ ಯತ್ನ. ಹೊಸಗನ್ನಡದ ಉಳಿವಿಗಾಗಿ ನನ್ನ ಪ್ರಾಮಾಣಿಕ ಪ್ರಯತ್ನ. ...