ಕವನ - ನಯನ

ಕಣ್ಮುಚ್ಚಿ ಕಣ್ತೆರೆಯೆ ಹೀಗೊಂದು ಕವನ
ಬಚ್ಚಿಟ್ಟ ಭಾವಗಳ ಕನ್ನಡೀಕರಣ
ಪಲ್ಲವಿಸುವಾ ಮನಕೆ ಶಬ್ದಗಳ ಚರಣ
ಪದಗಳಲಿ ಪೋಣಿಸಿದ ಚಂದದಾಭಾರಣ




ಸಾಲುಸಾಲುಗಳಲ್ಲಿ ಸಾಲು ದೀಪದ ಬೆಳಕು
ನೂರೆಂಟು ಅರ್ಥಗಳು, ನೂರು ನೆನಪಿನ ಮೆಲಕು
ಹೊಸ ಹೊಸತು ಬಿತ್ತರದ ಆಶಯವು ದಿನದಿನಕು  
ಹೊಸ ಭಾವಲೋಕಗಳ ಪರಿಚಯವು ಮನಮನಕು




ಪಲ್ಲವಿಯ ಪಂಕ್ತಿಗಳ ಪದಪುಂಜ ಅಂದ
ಚರಣ ಚೆಲ್ಲುವ ಚೆಲುವ ಚೈತ್ರಗಳೇ ಚಂದ
ನೂರಾರು ಬಣ್ಣಗಳು ಕವನಗಳ ಸೊಗಸಿನಲಿ
ನವ್ಯತೆಯ ಆಗಸವು ಬೊಗಸೆಯಲ್ಲಿ!! 

ಹಾಸ್ಯ

ಹೊಸತು ಭಾವಗಳಿಂದ ಹೊಸತು ಜೀವಗಳಿಂದ
ಹಳೆಯ ಗತ ಭೂತಗಳನೆಲ್ಲ ಮರೆತು
ಮೂಡಿ ಬರುವಾ ನಗೆಯು ಸಂತಸದ ಸಂಕೇತ
ಚಿಮ್ಮುವುದು ಚಿಲುಮೆಯಲಿ ಹೃದಯ ತೆರೆದು



ಹಾಸ್ಯವದು ಉಸಿರಂತೆ ಹೃದಯವಂತಿಕೆಗೆಲ್ಲ
ಉಸಿರಂತೆ ಹೊಸತು ನಸುನಗೆಗೆಲ್ಲಕೂ
ಲಘುನಗೆಯ ಗೆಳೆತನವೇ ಸಂಜೀವಿನಿಯ ಚಿಲುಮೆ
ದುರಿತಕ್ಕು ದುಃಖ ದುಮ್ಮಾನಗಳಿಗೂ


ನಗುವು ಸಹಜದ ಧರ್ಮ ನಗಿಸುವುದು ಪರಧರ್ಮ
ಕಾವ್ಯದಲಿ ಕಗ್ಗದಲಿ ಎಲ್ಲ ಲಿಖಿತ
ಕಾಸು ಕರಿಮಣಿ ಇಲ್ಲ ದಿವ್ಯ ಔಷಧಿಗಿಲ್ಲಿ
ಹಾಸ್ಯ ಹುರುಪಿನ ಸೆಲೆಯು ಅರ್ಥಸಹಿತ


ಬನ್ನಿ ಅನುಭವಿಸೋಣ ಮನಸಾರೆ ಸುಖಿಸೋಣ
ಬದುಕಲ್ಲಿ ಮುಕ್ತ ಹಾಸ್ಯವನು ತುಂಬಿ
ತೆರೆದ ಬಾನಿನ ತೆರದಿ ಜಲಪಾತದಂದದಲಿ
ಹೀಗೊಮ್ಮೆ ನಕ್ಕುಬಿಡಿ ಹೃದಯತುಂಬಿ

ಶೀರ್ಷಿಕೆ

ಎದೆಯ ಹೂದೋಟದಲಿ
        ಮೊಗ್ಗು ಬಿರಿಯುವ ಮೌನ

ಕಣ್ಣ ಭಾಷೆಯ ಅನುವಾದದಲಿ
        ಮನ ತಲ್ಲೀನ. 


                                ತಾರೆಗಳ ಬೆಳಕಲ್ಲಿ 
                                  ತೆರೆವ ಆಗಸಯಾನ
                           ವರ್ಷ ಋತುವಿನ ಹಾಗೆ 
                                ಮಳೆ ಇಳೆಯ ಸಮ್ಮಿಲನ.


ಘಳಿಗೆಗಳ ಬಡ್ಡಿಕಾಸಿಗೆ 
       ಕೊಂಡ ಮಾತುಗಳು
ನಿದಿರೆಯನು ಅಡವಿಟ್ಟು 
       ಪಡೆದ ಹೊಸ ಕನಸುಗಳು
                             
                              ಎಷ್ಟೆಷ್ಟು ದೋಚಿದರೂ 
                                  ಖಾಲಿಯಾಗದ ಮುಗುಳು
                              ಮೇಘಸಂದೇಶಕ್ಕೆ 
                                  ಸಾಕ್ಷಿಯಾಗುವ ಇರುಳು.


ಮುಂಜಾನೆ ಮುಸ್ಸಂಜೆ 
        ಹೊತ್ತು ಗೊತ್ತುಗಳೇಕೆ 
ಹಿತವಾಗಿ ಪೀಡಿಸುವ
        ನೆನೆಪುಗಳ ದಿಬ್ಬಣಕೆ
                              
                             ನೂರು ಬಣ್ಣವ ತೆರೆವ 
                                   ಭಾವಗಳ ಬತ್ತಳಿಕೆ
                             ಒಲವ ಶೀರ್ಷಿಕೆ 
                                   ನನ್ನ ಈ ಕನಸ ಕವನಕ್ಕೆ!

ಸಂಭ್ರಮದ ಸವಿ ಸಮಯ

ಹನಿಗವನಗಳು ಮೂಡಿ ಬರುವ ಸಮಯ

ಸಿಹಿಗನಸುಗಳು ಕಾಡಿ ಬರುವ ಸಮಯ

ನನಗಾಗಿ ಒಲವೆಂಬ ಸವಿಯ ಸುಧೆಯ

ನಲುಮೆಯಾ ಪ್ರಿಯಕರನು ತರುವ ಸಮಯ

                                    ಹಸಿವೆಯೂ ಹಿತವಾಗಿ ಬರುವ ಸಮಯ

                                    ನಿದಿರೆಯ ಮಧುರವಾಗಿ ಮರೆವ ಸಮಯ

                                    ನನ್ನ ನಿನ್ನಯ ನಡುವೆ ಸಣ್ಣ ತೆರೆಯ 

                                    ಸರಿಸುತ್ತ ಸನಿಹಕ್ಕೆ ಬರುವ ಸಮಯ

ಪ್ರೇಮ ಪತ್ರಗಳನ್ನು ಬರೆವ ಸಮಯ

ಈ ನಿವೇದನೆ ನಿನಗೆ ತರುವ ಸಮಯ

ಕಿವಿಗೊಟ್ಟು ಕೇಳುತ್ತ ನನ್ನ ಕರೆಯ

ಒಪ್ಪಿ  ನೀ  ಓಲೈಸಿ ಬರುವ ಸಮಯ 

ಪರಿಚಯ

ನಿನ್ನ ಕಂಗಳು 

    ನನ್ನ ಸೆಳೆಯಲೆಂದೇ 

             ತಾಲೀಮು ನಡೆಸಿದಂತೆ 

ನಿನ್ನ ನುಡಿಗಳು 

    ನನ್ನ ಮಾತುಗಳ ಬಂಧಿಸಿ

              ಮೌನಿಯಾಗಿಸುವಂತೆ 

ನಿನ್ನ ನಗೆ 

   ನನ್ನ ನೋವುಗಳಿಗೆ 

               ಮುಲಾಮು ಹಚ್ಚಿದಂತೆ 

ನಿನ್ನೊಲವು

    ಹೊಸದಾದ ನನ್ನನ್ನು

               ನನಗೇ ಪರಿಚಯಿಸಿದಂತೆ

ನಿನ್ನೊಳಿದೆ ನನ್ನ ಮನವು....

ನದಿಯ ದಂಡೆಯ ಮೇಲೆ
ಸುಖವಾದ ಸಂಜೆಯಲಿ
ಒಬ್ಬಳೇ ಕುಳಿತಿರಲು ದಿಟ್ಟಿಸುತ್ತ
     
             ತಂಗಾಳಿ ಹಿತವಾಗಿ
             ಕೆನ್ನೆಗಳ ಸ್ಪರ್ಶಿಸಿದೆ
             ಕಣ್ಣ ಹನಿಗಳ ಮೆಲ್ಲ ಒಣಗಿಸುತ್ತ


ಕಾಡುತಿಹ ನೆನಪುಗಳ
ದೂಡುವಾ ಯತ್ನದಲಿ
ಸಾಗುತಿಹೆ ಮೌನಡೆದೆ ಪಯಣಿಸುತ್ತ
              
               ದಣಿದೆರೆಡು ನಯನಗಳ
               ರೆಪ್ಪೆಗಳು ಅಪ್ಪಿಹವು
               ಎದೆಯ ಭಾರವ ಮೆಲ್ಲ ಕರಗಿಸುತ್ತ


ನೀರಿನಲೆಗಳು ಹರಿದು
ಪಾದಗಳ ಚುಂಬಿಸಿವೆ
ಹಿತವಾಗಿ ಬೆರಳುಗಳ ಸ್ಪರ್ಶಿಸುತ್ತ
        
                ದೂರದಾ ಚಂದಿರನ
                ಹಾಲು ಬೆಳದಿಂಗಳದು
                ತಂಪನೆರೆದಿದೆ ಮನವ ಬೆಳಗಿಸುತ್ತ


ಎಲ್ಲ ತರಹದ ಚಿಂತೆ
ಭೂತಕಾಲದ ಸಂತೆ
ಕೊಚ್ಚಿಹೋಗಿದೆ ಇಂದು ನೀರಿನತ್ತ


                   ಇಂದಿನಾ ಸಂಜೆಯದು
                    ನನಗಾಗಿ, ನಾನಿಲ್ಲಿ
                    ನಾನಾಗಿ ಜೀವಿಸಿಹೆ ನಸುನಗುತ್ತ
ನನ್ನ ಈ ಏಕಾಂತ
ನೆಮ್ಮದಿಯ ಹುಡುಕಾಟ
ಸುಖವಾಗಿ ಸವಿದಿಹೆನು ಅನುಭವಿಸುತ
                
                     ಕ್ಷಣಿಕ ಸುಖವಿದು ನಲ್ಲ
                     ಮತ್ತೆ ನಿನ್ನಯ ನೆನಪ
                     ಜಾಡು ಹಿಡಿದಿದೆ ಮನವು ಕನವರಿಸುತ
              
                 

ಭಾವನಾ

ತುಟಿಯ ನಸುನಗೆಯಲ್ಲಿ ಭಾವಗೀತೆಯ ಹೆಣೆದು,
ಕಣ್ಣ ಹನಿಗಳ ಲಯಕೆ ಮಟ್ಟು ಹಾಕುತ ಕುಣಿದು,
ಬೆಳಗಿ ಭಾವದ ಜ್ಯೋತಿ ಮನದ ಮಂಟಪದಲ್ಲಿ,
ಹೃದಯಗಳನರಳಿಸುವ  ಕನಸುಗಳ ಬೆಳಕಲ್ಲಿ.
              
                     ಕೋಪ ತಾಪವ ಕಳೆದು, ಕುಗ್ಗಿಸುತ ದುಃಖಗಳ,
                     ಸಿಕ್ಕ ಸುಖಗಳ ಪಾಲನನುಭವಿಸುವ...
                     ಭಾವದೇವಿಯೆ ಬೆಳಕು ಸಿಹಿ ಕನಸುಗಳ ಮೆಲುಕು,
                     ಹೊಸಬಾನು, ಹೊಸಭಾವದಲಿ ಹಾರುವ.....