ಸುಖವಾದ ಸಂಜೆಯಲಿ
ಒಬ್ಬಳೇ ಕುಳಿತಿರಲು ದಿಟ್ಟಿಸುತ್ತ
ತಂಗಾಳಿ ಹಿತವಾಗಿ
ಕೆನ್ನೆಗಳ ಸ್ಪರ್ಶಿಸಿದೆ
ಕಣ್ಣ ಹನಿಗಳ ಮೆಲ್ಲ ಒಣಗಿಸುತ್ತ
ಕಾಡುತಿಹ ನೆನಪುಗಳ
ದೂಡುವಾ ಯತ್ನದಲಿ
ಸಾಗುತಿಹೆ ಮೌನಡೆದೆ ಪಯಣಿಸುತ್ತ
ದಣಿದೆರೆಡು ನಯನಗಳ
ರೆಪ್ಪೆಗಳು ಅಪ್ಪಿಹವು
ಎದೆಯ ಭಾರವ ಮೆಲ್ಲ ಕರಗಿಸುತ್ತ
ನೀರಿನಲೆಗಳು ಹರಿದು
ಪಾದಗಳ ಚುಂಬಿಸಿವೆ
ಹಿತವಾಗಿ ಬೆರಳುಗಳ ಸ್ಪರ್ಶಿಸುತ್ತ
ದೂರದಾ ಚಂದಿರನ
ಹಾಲು ಬೆಳದಿಂಗಳದು
ತಂಪನೆರೆದಿದೆ ಮನವ ಬೆಳಗಿಸುತ್ತ
ಎಲ್ಲ ತರಹದ ಚಿಂತೆ
ಭೂತಕಾಲದ ಸಂತೆ
ಕೊಚ್ಚಿಹೋಗಿದೆ ಇಂದು ನೀರಿನತ್ತ
ಇಂದಿನಾ ಸಂಜೆಯದು
ನನಗಾಗಿ, ನಾನಿಲ್ಲಿ
ನಾನಾಗಿ ಜೀವಿಸಿಹೆ ನಸುನಗುತ್ತ
ನನ್ನ ಈ ಏಕಾಂತ
ನೆಮ್ಮದಿಯ ಹುಡುಕಾಟ
ಸುಖವಾಗಿ ಸವಿದಿಹೆನು ಅನುಭವಿಸುತ
ಕ್ಷಣಿಕ ಸುಖವಿದು ನಲ್ಲ
ಮತ್ತೆ ನಿನ್ನಯ ನೆನಪ
ಜಾಡು ಹಿಡಿದಿದೆ ಮನವು ಕನವರಿಸುತ